حج د اسلام پنځه بناوو کې یوه بناء ده، قرآن کې الله -جل جلاله- فرمایلي: {وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا وَمَنْ كَفَرَ فَإِنَّ اللَّهَ غَنِيٌّ عَنِ الْعَالَمِينَ} [آل عمران: 97] 

ژباړه: (د الله لپاره په هغه خلکو چې بیت الله ته د تلو وس لري حج فرض دی او څوک چې کفر کوي، نو بې له شکه الله -جل جلاله- له مخلوق نه غني او بې پروا دی.) 

نبي کريم -صلی الله علیه وسلم- فرمایلي: (پر چا چې حج فرض وي او نه یی ادا کوي، د ده خوښه ده چې یهودي مړ کېږي او که نصراني.) 

د حج فرضیت په هېڅ بهانه نه ساقـطیږی، ځنیې خلک چې په دين نه پوهېږي وایي چې زموږ په پیسو عربان عياشي کوي، نو ځکه حج ته نه ځو، دا بې ځایه دلیل دی ځکه چې موږ خپلې پیسې په کرایه، خوراک او د اوسیدو په ځای مصرف کوو، موږ خپلی پیسې عربو ته خو نه ورکوو چې عياشي پرې وکړي، که کوم عرب يا عجمي تجار له موږ نه کومه روپۍ وګټي او بيا پرې حرام کار کوي، نو دا خو يواځې حج پورې تړلې خبره نه ده، په دې خپل وطن کې هم موږ ډېر تجاران لرو چې له موږ نه په ګټل شوو پيسو شراب څښکي، قمار وهي، سود کوي نو اوس به موږ د اړتيا شيان نه پېرو، چې هسې نه زموږ په پیسو څوک حرام کار ونه کړي. 

يوه طبقه اصل کې دين سره ورانه ده له دې امله په پلمو او بهانو د دين احکام په نا معقوله توګه تر بريد لاندې نيسي. 

بلکې کوم خلک چې دا خبرې کوي خپل اخلاقي او د تقوا حالت يې هم ډېر ښه نه دی.